નમસ્તે વિઘ્નરાજાય ભક્તાનાં વિઘ્નહારિણે ।
અભક્તાનાં વિશેષેણ વિઘ્નકર્ત્રે નમો નમઃ ॥૧॥
આકાશાય ચ ભૂતાનાં મનસે ચામરેષુ તે ।
બુદ્ધ્યૈરિન્દ્રિયવર્ગેષુ ત્રિવિધાય નમો નમઃ ॥૨॥
દેહાનાં બિન્દુરૂપાય મોહરૂપાય દેહિનામ્ ।
તયોરભેદભાવેષુ બોધાય તે નમો નમઃ ॥૩॥
સાઙ્ખ્યાય વૈ વિદેહાનાં સંયોગાનાં નિજાત્મને ।
ચતુર્ણાં પઞ્ચ માયૈવ સર્વત્ર તે નમો નમઃ ॥૪॥
નામરૂપાત્મકાનાં વૈ શક્તિરૂપાય તે નમઃ ।
આત્મનાં રવયે તુભ્યં હેરમ્બાય નમો નમઃ ॥૫॥
આનન્દાનાં મહાવિષ્ણુરૂપાય નેતિ ધારિણામ્ ।
શઙ્કરાય ચ સર્વેષાં સંયોગે ગણપાય તે ॥૬॥
કર્મણાં કર્મયોગાય જ્ઞાનયોગાય જાનતામ્।
સમેષુ સમરૂપાય લમ્બોદર નમોઽસ્તુ તે ॥૭॥
સ્વાધીનાનાં ગણાધ્યક્ષ સહજાય નમો નમઃ ।
તેષામભેદભાવેષુ સ્વાનન્દાય ચ તે નમઃ ॥૮॥
નિર્માયિકસ્વરૂપાણામયોગાય નમો નમઃ ।
યોગાનાં યોગરૂપાય ગણેશાય નમો નમઃ ॥૯॥
શાન્તિયોગપ્રદાત્રે તે શાન્તિયોગમયાય ચ ।
કિં સ્તૌમિ તત્ર દેવેશ અતસ્ત્વાં પ્રણમામ્યહમ્ ॥૧૦॥
તતસ્તં ગણનાથો વૈ જગાદ ભક્તમુત્તમમ્ ।
હર્ષેણ મહતા યુક્તો હર્ષયન્મુનિસત્તમ ॥૧૧॥
༺༺༺ શ્રી ગણેશ ઉવાચ ༻༻༻
ત્વયા કૃતં મદીયં યત્સ્તોત્રં યોગપ્રદં ભવેત્ ।
ધર્માર્થકામમોક્ષાણાં દાયકં પ્રભવિષ્યતિ ॥૧૨॥
વરં વરય મત્તસ્ત્વં દાસ્યામિ ભક્તિયન્ત્રિતઃ ।
ત્વત્સમો ન ભવેત્તાત તત્ત્વજ્ઞાનપ્રકાશકઃ ॥૧૩॥
તસ્ય તદ્વચનં શ્રુત્વા કપિલસ્તમુવાચ હ ।
ત્વદીયામચલાં ભક્તિં દેહિ વિઘ્નેશ મે પરામ્ ॥૧૪॥
ત્વદીયભૂષણં દૈત્યો હૃત્વા સદ્યો જગામ હ ।
તતશ્ચિન્તામણિં નાથ તં જિત્વા મણિમાનય ॥૧૫॥
યદાહં ત્વાં સ્મરિષ્યામિ તદાત્માનં પ્રદર્શય ।
એતદેવ વરં પૂર્ણં દેહિ નાથ નમોઽસ્તુ તે ॥૧૬॥
༺༺༺ ગૃત્સમદ ઉવાચ ༻༻༻
તસ્ય તદ્વચનં શ્રુત્વા હર્ષયુક્તો ગજાનનઃ ।
ઉવાચ તં મહાભક્તં પ્રેમયુક્તં વિશેષતઃ ॥૧૭॥
ત્વયા યત્પ્રાર્થિતં વિષ્ણો તત્સર્વં પ્રભવિષ્યતિ ।
તવ પુત્રો ભવિષ્યામિ ગણાસુરવધાય ચ ॥૧૮॥